فاكرين إنّى عايزك عشان لقطة جميلة زى القمر لأنك حنونة فى طبعك طيبة أقرب للملايكة منك للبشر أو عايزك صفقة جوازة ع السريع لا مين شاف ولا مين شعر وأقول بحبك يقول مش مصدق طيب بص فى عنيا لو عندك نظر عايز أشق صدرى وأطلع قلبى بس خايف برضه ينكروا حبى ويقولوا ده انتحر
احملوا أقواسكم وصوبوا جيدا وارمونى فما زال بى متسع لمزيد من لجراح وان كنتم لا تحسنون رميا فادنوا منى واضربوا بالسيف أتخافون ثورتى إذا تراجعوا قليلا واطعنونى بالرماح اطعنوا بطول الجسد وعرضه فقط .. ابتعدوا عن القلب يجب أن يظل قلبى حيا حتى تنالوا السماح ويحه هذا القلب ياله من خائن يرى أشلائى تتناثر فيصافح قاتلى ولا يطلب الثأر لما راح أهو قلبى؟؟ أظنه كذلك فهو فى جسدى أو بلفظ أدق فى بقايا جسدى ... المستباح أعيش دهرى حزينا وتأتينى السعادة مختبئة .. متدثرة بالسواد وجلة كأنما ولدت من سفاح وأسير فى عمرى جَلدا.. صابرا أدوس على الأشواك أمنّى نفسى أن قريبا سأجد المستراح وإيمانى يصلب قامتى وعزيمتى ترفع هامتى وتشتد علىّ الريح وأرفض الانبطاح وأسير .. إلى مصيرى المحتوم أطرق أبوابا لا أدرك ما خلفها ولكنى أدعو ربى بالفلاح وأسعى لطلب سعادتى ولا أدرى أأجدها يوما أم يغمرنى الشقاء... باكتساح أيا حبيبتى أ أنت حبيبتى؟ أدوما انت هنا فى الضيق قبل البراح؟ أيا عمرى أأنت حقيقة؟ أم أضغاث أحلام تذهب إذا ما الفجر لاح
ده منوفى واللى قبله كان منوفى واللى بعده شكله هيبقى منوفى هى إيه الحكاية لعنة ولا رزية واحد يسلم واحد قلت يمكن وراثة طيب والوزرا كمان تكونشى جمعية؟؟ جمعياتنا شهر وشهر ودول جمعياتهم وزارة و وزارة ده الشباب وانت السياحة وأنت امسك الخارجية انت بتحب الكباب امسك التموين أما أنا فأمسك الداخلية لفيت فيك يا مصر كتير مشفتش زيك يا منوفية محافظة مشيّبة كل المحافظات صعايدة وبحاروة وسواحلية والمنايفة دول أشكال وألوان مدارس وأساتذة وكليات واحنا يادوب معانا محو الأمية يلاعبونا التلات ورقات عايزين استقلال قضاة و نعدل الدستور وماله يا عنيا هم يا دوب سنتين بقينا عايزين نحرر القضاة ونسينا يعنى ايه دستور غطينى وصوتى يا ولية أبص لحال بلدنا يا ولداه والله تصعب عليا لمّا اللى أصله كان فلاح على إيديه خيرها راح أمال بن الذوات هيعمل فينا إيه بقصر جاردن سيتى وشهاته الأمريكانية أهى المعونة بتنقص عليهم مش علينا وإيش ياخد الريح من البلاط لا شفنا معونة أمريكانى ولا منحة يابانية وحريقة فقلعة الكبش قعدنا نلطم عليها حنّت السعودية وبعتت عشرين مليون ولا كانوا خمسين والله سهى عليا وبعد شهر قول شهرين حال الناس هو هو وفى الشوارع بايتين فالسعودية قالت فلوسنا فين هاهاها .. ابقى قابلنى يا عنيا استنى هنعمل لجنة تنبثق منها لجنة تشكل لجنة فرعية ونكتشف بعد مرور سنين ان الجريمة دى جذورها فرعونية وكان الحرامى مختل عقليا من جدود التوربينى حرق معبد الإلهة الفلانية أيام الحاكم معرفش مين من الأسرة العلانية ما هو الخلل وراثى لابد فى جيناتنا زى ما الحكم وراثة لأولاد المنوفية
وجالى بيحكى ويشكى قال إيه خلاص خلصنا ومسحتنى من الفيس بوك أخرتها كدة يا ستى طيب وآدى ديليت من الأوتلوك آدى أخرة مجايب الهاي فايف واللى من ناحيته لازم فيه تشك أصل النت عند العرب أكبر اشتغالة أجمل صور البنات اللى حاططها ولاد بس لامؤاخذة زبالة فاضيين ما تعرف أو احتمال عايزين ماقولنا لا مؤاخذة مالك زعلان دى عيال عٍوالة يا بابا هات يا ماما جيف مى أو ابعتولى حوالة ولاد عاملين فيها بنات وبتصاحبهم برضه بنات أصلهم رجالة أنا عايز أفهم هى يعنى حداقة ولا شغلانة بدل الايميل نعمل عشرة ولا عشرين وأكوونت على الهاى فايف ومصرواى وعلى الفيس بوك اعمل اتنين تقفل اللى اتقفشوا وتسيب اللى لسة شغالة وسيرش على النت يا معلم كام صورة لمزة جامدة وابلوود وتشتغل الحالة دى مش تكتكة دى وكسة كام سيرش للكلية عملته وكام " كام " للبنات فتحته قال الهانم من المهندسين وهى فى آخر شبرا فوق محل البقالة تعرف إن واحد بس عربى فى كل متين واحد على النت داخلين وتعرف إن الواحد دة فاكره معمول للشات وشقط البنات ونقول ده للعلام وادخل على وكالة ناسا تلاقى الناس واقفة فى العلم محتاسة قلنا يا ما قلنا لما زهقنا م القوالة
لذيذة قوى اللعبة دى .. أحسن من الـ FIFA .. كالعادة كل ألعاب الكمبيوتر والـ PlayStation عندى بتمر مرور الكرام وتبقى ألعاب كرة القدم هى الصديقة الدائمة عند الملل
أختار الميلان وألاعب اليوفى ( اليوفنتوس أو السيدة العجوز) وطبعا أختار أعلى درجة صعوبة.. مفترى من يومى
يبتدى الماتش .. ضاغطهم فى نص ملعبهم .. وتشكيل جبار فى أرض الملعب .. وتنويع فى الهجمات يمين وشمال ومن القلب .. وفجأة .. هجمة مرتدة لليوفى .. وجون ... يا سلام .. أول هجمة ليهم بجون؟؟
غريبة يا أحمد ، مدير مكتب رعاية الطلاب بيقول إنك أجندة نشاط ومن حقك تدخل أى لجنة تختارها سواء أسر أو رياضية أو جوالة ، ورغم كدة رافض إنك تدخل الاتحاد
أصلى اتكلمت آخر السنة اللى فاتت وطالبت بحقنا فى جائزة الأسرة المثالية .. وأكيد قال إذا كنت باتكلم وأنا طالب عادى يبقى هاعمل إيه لو دخلت الاتحاد
وهتعمل إيه
مش و اختار القاعدة بالتزوير ومظبطها للناس بتوعه .. أنا مشيت خمسين متر بس جوة الكلية كسبت 6 أصوات من 10 غصب عنه .. وأديها جت غصب عنه
رئيس اتحاد الطلاب المنتظر:يا أحمد أنا محرج منك قوى بس الموضوع فى وشى .. أنا اللى اخترت القاعدة ومدير الرعاية مشى كلامى عشان ينتخبوا اللى هو عايزهم ودلوقت انت لخبطت حساباته كلها ، إنت صاحبى وعشان خاطرى متحرجنيش
منافسى الأول : يا أحمد أنا فى بكالوريوس ومعنديشفرصة تانى أدخل إتحاد .. لازم أدخل السنة دى.
منافسى الثانى :يا أحمد كل الناس عارفة من السنة اللى فاتت إنى هأمسك اللجنة الرياضية .. وشكلى هايبقى بايخ قوى وسط الكلية وزمايلى لو مدخلتش الاتحاد
ارتاحوا كلكم .. باى باى يا اتحاد .. بس بمزاجى وبعد ما كسبت غصب عنكم وعن تزويركم فى الانتخابات
****
يوووووووه ... الجون التانى دخل .. مستحيل النحس ده .. هجمتين ليهم بجونين ؟؟
نلعب ماتش تانى .. نبص على الـsettings .. تمام .. التحكم فى تغيير اللاعبين manual عشان الحركات البايخة بتاعت الكمبيوتر .. أبقى بتزحلق بمدافع يغير هو تلقائى على مدافع تانى وألاقينى لبست بنالتى (ضربة جزاء) بدون ذنب .. المهم الماتش ابتدى وسيطرة زى الماتش الأولانىوقبل نهاية الشوط الأول يطلعوا كالعادة بالهجمة المرتدة ويجيبوا جون .. المشكلة المرة دى إن رغم التحكم الـ manual اللى بيدينى تحكم أكبر فى اللاعبين إلا إن حارس المرمى وبغرابة شديدة طلع لغاية خط الـ18 ومهاجم الفرقة التانية دخل الكورة بمنتهى السهولة
يعنى أعمل إيه تانى عشان أخلص من التفاهات والأخطاء الفردية دى؟
****
عربيات من دى
رئيس الهيئة والنائب
تمام أخيرا هأقابلهم
رايح فين .. الكل بيهرب من قدام الريس .. نازل سلخ فى الكل
لازم اتكلم .. الساكت عن الحق شيطان أخرس
*****
السلام عليكم .. أحمد على .. مهندس صيانة
أهلا طلباتك إيه؟
الموقع هنا من أحسن المواقع على مستوى العالم فى خصائص الرياح
الحمد لله .. دى حاجة كويسة
بس مالناش يد فيها .. دى نعمة من ربنا .. المفروض إننا نستثمر النعمة دى ونشتغل صح.. نختار نوع توربينة كويس وفريق صيانة كفؤ وأدوات وقطع غيار مظبوطة
الكلام ده عارفينهومالكش دعوة بيه .. طلباتك إيه
ماينفعش النوبينات تقف كام شهر عشان نوع زيت ناقص وأول ما تشتغل تقف تانى عشان نوع شحم ناقص
مالكش دعوة .. طلباتك إيه
عندنا خامات كويسة سواء مهندسين أو فنيين والمفروض يتدربوا عشان مستواهم يرتفع
ماتتكلمش عن حد .. اتكلم عن نفسك بس.. طلباتك الشخصية
عايز أتدرب على تحليل الـ Vibration وفحص الـ Gear Box
ياسلام ... أول جون أجيبه النهاردة .. وإيه فى أول 5 دقايق .. جون ملعوب تمام .. Throw وبعديه انفراد ولعبة بحرفنة Loop من فوق حارس المرمى .. الانتقام قادم أيتها العجوز (لقب فريق اليوفنتوس هو السيدة العجوز)
يااااه ... واحد – واحد .. بصراحة جونهم المرة دى ملعوب .. كدة ما أزعلش .. نكمل لعب .. أيوة كدة جون تانى ليا وتبقى النتيجة 2-1 .. يالا شد حيلك يا حمادة لاوم حماس وإصرار
*****
عايز أسيب الشغل
إعقل يا بنى .. حد طايل ؟ دى حكومة
ما هو هشان حكومة .. مافيش شغل صح ، ولا فى فلوس كمان .. وعايزينى ما أفكرش وأربط الحمار مطرح مايقول الحمار
وماله.. ماتربطه مكان ما يقولولك
أنا مهندس مش عربجى .. وبعدين عايزينى ألغى دماغى على الأقل يدفعوا التمن .. إنما أبيع شهادتى ودماغى عشان ألف جنيه فى الشهر ؟؟ دى البيعة تبقى خسرانة قوى
*****
اتنين – واحد ليا وخلاص الماتش هيخلص بعد عشر دقائق
ايه الملل ده .. ليه فجأة كدة فقدت الحماس والاهتمام وهم طبعا ما بيستنوش .. اتعادلوا
أفوق .. ياترى ألعب ولا بلاش .. أحاول أكسب ولا مش فارقة
لا .. هالعبعشان أكسب .. أنا بكره الخسارة فى حد ذاتها
أضغط ... أقطع الكرة .. أباصى .. تتقطع .. أخطفها تانى .. أعدى من واحد والتانى .. كانت هتطلع أوت ولحقتها وعدلت وشى على جوة الملعب ودخلت على الـ 18 طلع مدافع من تحت الأرض وقطع الكورة بس جبتها تانى وغيرت الملعب للجنب التانى ورفعت الكورة ولعبة بالهد (بالرأس) جت فى العارضة .. ده وقته؟؟ كورنر أرفعه وتطفيشة على نص الملعب .. ويصفر الحكم
الماتش تعادل ... تلعب إكسترا تايم؟؟
****
نصيحة خليك فى الهيئة لغاية ما القطاع الخاص يبتدى شغل فى موقع جبل الزيت وساعتها مرتبك هيرتفع كتير قوى وهتكون عندك خبرة 4سنين على الأقل فى مجال الرياح وانت هنا من الناس الكبيرة اللى شايلة شغل .. ومين عرف
ولغاية ما يعدوا السنتين ولا التلاتة دول أعمل إيه ؟ لافلوس ولا راحة نفسية ولا جواز
المشروعين لسة محتاجين سنة أو اتنين على الأقل عشان أقدر أخد منهم دخل يساعدنى
اصبر
المشكلة انى عندى 29 سنة .. يعنى آخر الشباب .. بعد كدة يبقى بلعب فى الوقت الاضافى .. على العموم ربنا يكتب اللى فيه الخير
*****
تلعب وقت إضافى ولا تنهى الماتش تعادل؟
طبعا ألعب .. مش بحب الهروب ولا الحلول السهلة
أول دقيقة فى الوقت الإضافى .. أسيب الـ Joy Stick و أعدل السماعات على ودانى عشان أسمع أغنية Hero لـ Enrique Iglasius يقطعوا الكورة ومقدرش أستردها لغاية مايجيبوا جون .. تلاتة اتنين ليهم
*****
المشكلة إن الأغنية بتقول I can be your hero .. ممكن يكون حبيبها .. بطلها ... ممكن ..بس مش هو البطل .. أو على الأقل لسة مابقاش البطل .. فى حاجات مانعاه .. ممكن يكون فارس .. بس ذنبه إنهم كسروا سيفه ... قتلوا حصانه ... سرقوا حلمه
******
ملعب نادى الاتحاد السكندرى
عايز أعمل إختبارات يا كابتن
الاختبارات ميعادها خلص
أنا من المنيا مش من اسكندرية ومكنتش أعرف المواعيد
طيب تعالى يوم الخميس الجاى
******
انت كويس يجى مكن .. بس انت من المنيا .. وكلية هندسة كمان
ممكن أحول على هندسة اسكندرية والشقة موجودة
بس برضه هندسة محتاجة تركيز والتزام .. هتختار الكورة ولا الكلية؟
الكلية يا كابتن (بعدها بسنة ولا اتنين رضا عبد العال خد650ألف جنيه فى الموسم وبعده العملية فتحت على البحرى)
*****
لسة ضاغط على الفريق المنافس .. وللأسف الشوطين الإضافيين خلصوا من غير ما أقدر أتعادل ... 3 هزايم فى 3 ماتشات مع العلم إنى متسيد الماتشات باكتساح فى الملعب .. نحس ؟ حظ .. نصيب ؟
طيب كمان محاولة ولا كفاية؟ تغير الفرق ولا تخرج من اللعبة كلها؟
وده برضه سؤال؟؟ طبعا هألعب وبنفس الفرق
يا رب .. انصرنى على الكمبيوتر ...على اليأس والإحباط وعلى الشغل والمكتبة والنت والناس .. ..وعلى نفسى
****
(ملحوظة : تفاصيل المباريات حقيقية وليست من خيالى ، وقد لعبت المباراة الرابعة .. وكنت متقدما بهدف حتى العشر دقائق الأخيرة .. وفجأة .. RESTART)
ربما للمرة الأولى أجد نفسى مضطرا للكتابة دفاعا عن كتابات سابقة.. عن مشاعر أحسستها سابقا ... عن آراء اعتنقتها فى فترات من حياتى فجأة .. اكتشف بعض من حولى أنى أمتلك مدونة ، رغم أنه لم يكن سرا على الإطلاق، ولكنى فوجئت أنه فى خلال عدة أيام تلقيت عدة تعليقات عن بعض الادراجات .. وكل هذه التعليقات جاءت من أشخاص يعرفوننى جيدا ولكنهم أخبرونى بأن بعض كتاباتى كانت مفاجأة لهم. لذا سأجيب على بعض الأسئلة باختصار نبدأ بموضوع " عايز أتجوز" التعليق الأول هو عدم معرفة البعض بأنى قد تقدمت لخطبة فتاة من قبل والرد أنى لست مجبرا على رواية كل تفاصيل حياتى لكل الناس .. أنا لا أخجل من هذه التجربة فأنا لم أخطئ فى أى شئ ولكن ما الداعى لأن أخبر الناس عن تجربة لم تتم؟ من باب الحصول على بعض الرثاء والتعازى؟ لست أنا هذا الشخص .. ثم أن عزائى من الله وأملى فيه كبير أنه سيرزقى خيرا منها... ولن أخبر الناس أيضا من باب الدردشة .. فأنا كتوم بطبعى ولا أخبرأحدا عن حياتى الشخصية إلا فيما ندر وفى حال وجود مناسبة تستدعى .. التعليق الثانى أنى تجاوزت الخطوط الحمراء : أعتقد أنهم يعنون حديثى عن الهرمونات وما شابه .. وهذا يعنى أنهم يثقون فى ويعلمون أنه ليس من طبعى الحديث فى أمور مشابهة .. ولكنهم ينسون أنى لم أكن أتحدث .. كنت أكتب .. وعندما أكتب أتحرر من بعض قيود الحديث التى يفرضها التزامى بالآداب العامة للحوار... أولا لأنى أحاور نفسى أثناء الكتابة ثانيا لأنه فى الكتابة لايرد عليا أحد فى لحظتها أما لو قلت نفس الكلام فى حوار فسيتشعب الحوار إلى مناطق لا أتحدث فيها عادة. ننتقل إلى موضوع : ليلة من اياهم السؤال الأول : ازاى اللى بينكم انتهى وعايز تكلم حبيبتك الأولى وتحكيلها ؟ والاجابة سيداتى سادتى : لقد كتبت عدة احتمالات لمن يمكن ان أتحدث معهم وبررت لما لايمكن أن أحدثهم فى تلك الليلة فمن المنطقى أن أفكر فيها فى جملة من استعرضتهم خاصة ونحن حديثى عهد بالانفصال وكانت اسباب الانفصال خارجة عن ارادتنا بمعنى أنه لم تكن بيننا خلافات شخصية جسيمة هى التى أنهت علاقتنا لذا فمن الممكن أن نتحدث .. ولكن من ناحية أخرى فالعلاقة انتهت بالفعل لذا لايمكن أن نتحدث .. كانت حبيبتى السابقة احدى الشخصيات المطروحة على عقلى التى يمكن أن أحدثها ومثلها مثل أى منهم كانت هناك أسباب تقول تحدث وأسباب تقول لا تتحدث .. وبالطبع لم أتحدث لأن هذا هو الصواب والمنطقى. ممكن الحب يتحول لصداقة؟ لا يا اخوانا مش ممكن .. لا فى الشرق ولا فى الغرب .. كل الأفلام والقصص والتجارب بتقول لأ.. بس أنا راجل تفكيرى متفتح حبتين و مدمن أفلام أجنبى كمان .. الراجل والست يطلقوا بس بينهم سبب يخليهم يتكلموا .. أولاد فى النص .. شغل مشترك .. أى حاجة .. تلاقيهم بيتكلموا عادى ولو سيرة مراته الجديدة أو جوزها التانى جت تلاقيهم بيتكلموا عادى .. متقبلين للأمر الواقع وبيفكروا بعقل احنا مش نافعين لبعض وكل واحد فينا لقى شريك حياة جديد ومناسب ليه .. خلاص " لافائدة من البكاء على اللبن المسكوب" يعنى لسة عايز تكلمها؟ لأ .. عايز الموضوع يمشى عادى .. أنا اخترت واحدة غيرها وربنا يتمم على خير بس عايز أعيش حياتى بدون حساسية .. أنا مش حرامى على راسه بطحة كل ما تيجى سيرة الأولانية أتكهرب أنا أو أهلى أو الانسانة اللى هتبقى مراتى بعد شوية بإذن الله .. عايز الناس تفهم انى" برأت من الهوى ومن الجنون" وداخل على " هوى وجنون جديد" ثالثا: لابديل قلت انى حبيت ولا بديل ليها ودلوقتى فى بديل .. ازاى والاجابة : الحب حاجة جميلة محدش عايزها تنتهى .. شئ منطقى لواحد رومانسى وعمال يقرا أشعار وقصص انه يفتكر ان حبه هيستمر وأعتقد انه حق مشروع ان أى واحد يحلم بكدة .. بس لما بيحصل العكس المفروض الواحد يتعايش مع الواقع ويستمرفى حياته .. بمعنى احنا بنموت لما نموت .. مش لما نترفد من الشغل ولا لما نتخانق فى أهالينا ولا لما قصة حب تفشل.. أنا حى .. إذا أنا حى أنا شايف إن الحب شئ جميل لذيذ ومهم جدا فى الحياة .. بس ركّز شوية كدة فى الجملة اللى فاتت .. "فى الحياة ".. يعنى جزء منها .. مينفعش أهد حياتى كلها عشان الحب .. قصدى حب شخص بعينه .. الحب مفهومه كبير وواسع.. حب ربك ودينك وبلدك .. حب نفسك وأهلك .. حب شغلك .. حب واحدة مراتك .. يعنى مراتك واحد من الناس وواحد من أشكال الحب ... مهمة جدا عشان أكتر واحدة هتشوفها وتأثر فى الباقى من عمرك بس برضه هى مش كل الناس .. أهلك وناسك وشغلك ليهم حق وموجودين وبيأثروا فى حياتك .. " فأعط كل ذى حق حقه"
سألونى بتحب مصر قلت انتو مجانين ازاى ما أحبهاش لو بخسر عمرى وحياتى وأندبح فيها يوماتى وغيرى فى خيرها عاش لو حتى ابن بلدى دبح كرامتى وباعنى ببلاش بحبها وأبيع عليها عمرى وما أبيعهاش لو يوماتى حزين و عايز أهرب مش عارف ازاى ومنين اسمها له رنين ومتقولوش بكاش بحبها من دينى وأشوف حسنها بعينى وبتجرى فى شرايينى ومن غيرها ما أبقاش أنا سمكة وهى بحرى معذبانى حيتانها ليل نهار بجرى وأدور على الراحة ما بلقاش لو فضلت نص عمرى أدرس وفرحوا بيا لما طلعت مهندس وآخر الشهر أقبض وأحسد النقاش لو عايز "أبنى بيتى" هه فى "عز الحديد" هه وكمان السمنة والزيت ما حرقوا بلدنانا ودخلت الانعاش وراجل م الدور الخامس رمى نفسه والتانى فى طابور العيش نسى اسمه وواحد لحق رغفين لو كلهم .. والناس باصين آدى دقنى لو عاش بحبها ولو قطر بتحل أزمة لبنان والسعودية ماسكة فلسطين وسوريا مع إيران لو واقفين بنتفرج ونستنى لما تفرج ونسأل على شرفنا قالوا راح مجاش لو معاجبنى حال الدنيا والدين وحاسس بحلمى بيموت جوة صدرى سجين بحبها وغيرها ما اتمناش
بحبها وحبها عندى جزء من الدين أرضى ... وطنى... أموت فداها شهيد تعالوا يا محبين قبل ما نفتحها بسنين بشرنا بيها رسولنا ووصانا ع اللى فيها ساكنين أهل ذمة ورحم وأصهار رسولنا وأخوال نبينا اسماعيل لو حتى بعد ألف وأربعميت سنة طلع منهم شوية وقالوا مهاجرين ومن الشوية طلع شوية تاجروا بالقضية وقالوا مضطهدين يا أخينا بص و فتح ما كلنا مطحونين بلدنا مش مسلم ومسيحى بلدنا سادة وعبيد .. آسف .. سادة و مواطنين لو عندك حنا انضرب شوف كام ألف أحمد ومحمد وحسين والبت كانت معيدة قلشوها عشان مسيحية طب كلم مسلم اتقلش عشان مفلسين مش عبد الجميد شتا انتحر عشان " غير لائق اجتماعيا" أصل أهله فلاحين وعد قبل وبعده كام واحد ماتوا منتحرين كام واحد جاله أجله وهم فى طابور العيش واقفين وعاركة قامت بين عرب قصر هور ورهبان " أبو فانا " م العرب مات واحد وم الرهبان أربعة مخطوفين وقامت حريقة ورجعوا الاربعة بس لسة أهل الدير زعلانين ضربونا عشان غلابة رجعنا ... بس هاتوا الخاطفين طيب و " خليل " اللى مات ما تجيبوا القاتلين والعرب دى مش أول مشاكلهم شايفين الأرض بتاعتهم لا دولة ولا مستثمرين ولو مش مصدقين واسألوا شباب الخريجين الحكومة واخداهم فى دوكة تديهم الأرض مدعوكة يزرعوها سنين وتنبت الأرض وتزهّر ويظهر اللون الأخضر ييجوا الغربان يا تدفع المعلوم يا نحرق المحصول كان حد قال مضطهدين؟ لأ .. قلنا شريعة غاب وأهل الحكم نايمين يا خوانّا فوقوا وكل واحد يؤدى واجبه صح ويطالب وميسيبش حقوقه هنبقى مبسوطين ولو شبعنا هنرجع زى زمان ليه هتخانق وأنا فرحان ده احنا أحن وأغنى أهل الأرض بس منهم لله الملاعين
أنا فى الزعفرانة .. الساعة عدت اتنين ونص بالليل .. لسة نايم من أقل من نص ساعة .. عندى شغل الصبح .. الموبايل يرن .. أصحى من النوم .. متوجس خيفة كالعادة .. ما هى دى لعنتى .. الهواجس والخوف ... اسم أختى على شاشة الموبايل ... الهاجس بيكبر .... - السلام عليكم - وعليكم السلام يا أحمد ( صوت ماما .. بتحاول تخليه طبيعى) - أيوة يا ماما .. خير - خير بإذن الله ... إنّا لله وإنّا إليه راجعون .. وكلنا لها - مين يا ماما - نزار مات ... - إيه .. نزار ... إنّا لله لله وإنّا إليه راجعون .. الله يرحمه .. إمتى؟ - لسة دلوقت .. مخرجش من المستشفى - حادثة ولا إيه اللى حصل ؟؟ - لأ .. تعب ودخل المستشفى - الله يرحمه .. هيدفنوه إمتى؟ - لسة مخرجش من العناية .. وأبوك ومصطفى لسة على باب المستشفى ومش راضيين يدخلوهم. - الله يرحمه .. ويصبر أهله.. السلام عليكم. ........... نزار مات ........... - السلام عليكم - وعليكم السلام ورحمة الله وبركاته - أيوة يا مصطفى ... انت فى المستشفى دلوقت؟ - على الباب ومش راضيين يدخلونا - ايه اللى حصل ؟ - تعب دخلوه العناية المركزة صرخ ومات - الله يرحمه مين جنبك - بابا وعلاء ( خال نزار) - هات علاء أعزيه - منهار ومش هيقدر يكلمكك - الله يصبره .. هات بابا - السلام عليكم - وعليكم السلام ورحمة الله وبركاته .. إنّا لله وإنّا إليه راجعون - أعظم الله أجرك - شد حيلك يا بابا .. عزيهم كلهم ... هأحاول أنزل عشان أحضر الجنازة - ماشى يا أحمد ... السلام عليكم .............. نزار مات ............ - السلام عليكم يا هانى ( ابن خالة نزار) - وعليكم السلام ورحمة الله وبركاته - انت فين يا هانى - انت بتتصل عادى ولا فى حاجة يا أحمد - أنا عرفت يا هانى .. انت وصلت ولا لسة - لا .. لسة فى الطريق - شد حيلك .. أعظم الله أجرك - كله بأمر الله - لما توصل عزيهم بالنيابة عنى لغاية ما أنزل - ماشى يا أحمد ........... نزار مات .......... - السلام عليكم يا أحمد - وعليكم السلام يا زهراء ... شدى حيلك ( أختى .. أكبر منى بسنتين ونص ...من سن نزار) - الله يرحمه - كله بأمر الله .. لله ما أعطى ولله ما أخذ ولله ما أبقى (أكتر واحدة حاولت أهديها .... عارفها حساسة .. ونزار صديق الطفولة الوحيد تقريبا .. مفيش صداقات برة العيلة .. حتى فى الطفولة) - أروح المستشفى يا أحمد؟ - براحتك يا زهراء .. بس مفيش كلام يغضب ربنا ... ابكى براحتك - لا ياأحمد .. ما انت عارف - عارف إن أول ما بنشوف الميت أو الجنازة ناس كتير بينهاروا .. خصوصا الستات. - أنا عايزة أودعه يا أحمد - خلاص روحى .. خدى ماما وروحوا .. بس من غير ما تعملى أو تقولى حاجة تغضب ربنا - إن شاء الله - شدى حيلك - الله يرحمه - آمين ............... نزار مات .............. دعيت على قد ما ربنا قدرنى .. وفكرت أسافر دلوفت .. أصحى حد من سواقين الموقع وأقوله عندى ظروف .. ياخدنى لكمين الزعفرانة واستنى أى حاجة نازلة على الكريمات وأسلمها لله ... فكرت نمت أثناء التفكير ... غصب عنى من التعب .. كان بقالى يومين تقريبا ما نمتش .. أو بمعنى أصح بقالى 5 أيام مواعيد نومى متلخبطة مع شغل كتير .. مش عذر كفاية إنى ما أسافرش .. بس ده اللى حصل ......... نزار مات ......... فى المكتب - السلام عليكم يا سعيد - وعليكم السلام يا أحمد .. لسة برن عليك فى الشقة عشان اتأخرت - عادى .. احتمال اسافر دلوقت - ليه ؟ - عندى حالة وفاة .. ابن بنت عمتى - عندة كام سنة ؟ - أكبر منى بسنتين ونص - الله يرحمه .. - المسيرى فين؟ - تلاقيه فى المكتب التانى ........ نزار مات .......... - السلام عليكم يا زهراء - وعليكم السلام ورحمة الله وبركاته - هيدفنوا امتى - خلاص يا أحمد - خلاص إيه - دفناّ ورجعنا خلاص - انت معاهم دلوقت - أيوة - مين جنبك؟ - زينب - هاتيها .......... نزار مات ......... - السلام عليكم يا زينب ( خالة نزار .. بنت عمى) - وعليكم السلام ورحمة الله وبركاته... ازيك يا أحمد - ازيك انت ... عاملة إيه - الحمد لله.. - شدى حيلك ... إنّ لله وإنّا إليه راجعون - كلنا لها يا أحمد .. محدش قاعد - الله يصبركم جميعا .. وخصوصا أبوه وأمه .. هى جنبك أكلمها ؟ - مش هينفع يا أحمد.. - طيب إبقى عزيها ... الله يصبرها - الله يرحمه - عايزة حاجة؟ - الله يكرمك يا أحمد - السلام عليكم ورحمة الله وبركاته - وعليكم السلام ورحمة الله وبركاته ............... نزار مات ........... السلام عليكم يا مسيرى وعليكم السلام يا أحمد .. تربينة واحد ألمانى مستنياك - أنا عندى حالة وفاة واحتمال اسافر - خلص التربينة وسافر ................... نزار مات ............... - لا مؤاخذة يا باشمهندس .. هزرت معام ومكنتش أعرف والله - ولا يهمك يا أسامة .. عادى ( أسامة أحب سواق ليا فى الموقع .. وأكتر واحد بيهزر معايا) - شد حيلك .. - إنا لله وإنا إليه راجعون ............ نزار مات .......... - الهوا ضعيف .... هنكمل شغل بكرة ............ نزار مات ........ - أنا طالع الشقة ... لو الهوا سرعته زادت قبل المغرب اتصلوا بيا - ماشى .......... نزار مات ........ - السلام عليكم يا بابا - وعليكم السلام ورحمة الله وبركاته - انت فى العزاء؟ - أيوة .. - إدينى أى حد جنبك أكلمه - خد نبيل ........... نزار مات ......... - السلام عليكم يا نبيل ( خال نزار ....وابن عمى) - وعليكم السلام يا أحمد - شد حيلك ... إنّا لله وإنّا إليه راجعون - بمكسيبتلااب ( شوية كلام ما فهمتوش) ( حاسس ببرود ناحيتى) - كله بأمر الله يا نبيل - يبتنللانسلبنشي ( همهمة مش مفهومة) - ادينى علاء يا نبيل .......... نزار مات ......... - السلام عليكم يا علاء - وعليكم السلام ورحمة الله وبركاته ( نفس برود أخوه) - شد حيلك ... كله مكتوب - الحمد لله - ................. - ............. - حد جنبك أعزيه يا علاء؟ - حد مين .. عايز تكلم مين؟ - أبوه جنبك؟ - لا .. ومش هينفع تكلمه - طيب ادينى أى حد من العيلة - ميدو جنبى .. تكلمه ( أخو نزار الصغير.. ابن بنت عمى) - هاته ................ نزار مات ........... - السلام عليكم ورحمة الله وبركاته - وعليك السلام ورحمة الله وبركاته - شد حيلك يا ميدو ... إنّا لله وإنّا إليه راجعون - الحمد لله يا أحمد ... الله يرحمه ( فى صوته إحساس بشرى ...أول واحد بيحس فى المكالمة دى) - اللى عند ربنا أحسن من اللى عندنا يا ميدو .. وربنا أرحم بيه مننا - ونعم بالله ... أيوة يا أحمد ... الحمد لله قوى .. دة رحمه - مش الحمد لله مات موتة كويسة .. - آه والله ... وشه كان منور وبيضحك زى ما يكون صاحى - الحمد لله ... شفته قبل ما يتكفن - آه .. كنت آخر واحد شلته أنا وخالته رجاء ( صوته ابتدى يتهدج .. وهيبتدى البكاء) - طيب الحمد لله يا ميدو انك اطمنت عليه .. احنا عايزن ايه غير الوش الأبيض والابتسامة والشهادة عند الموت - الحمد لله - يا ميدو الحمد لله ربنا مصبرك .. بس موت الابن تقيل قوى عند الأب والأم... - أيوة هما منهارين - خليك جنبهم ... وحاول تصيرهم وقولهم زى ما انت لسة قايل.. الحمد لله على حسن خاتمته وربنا يصبرهم ويديهم أجرهم .. الجنة لو صبروا يا ميدو - إن شاء الله يا أحمد .. كتر خيرك - كتر خيرى ازاى يعنى؟؟ ده أنا مقصر .. والمفروض أنزل - لا والله ما تتعب نفسك .. أنا عارف ظروف شغلك واسفرك - برضه المفروض أنزل .. بس للأسف الجنازة عدت عليا .. اتصلت الصبح قالولى دفنّنا .. - خلاص يا أحمد متتعبش نفسك - ممكن أكلم والدك ؟ - لا ... هينهار أكتر - ووالدتك ؟ - هى فوق فى الشقة وبرضه منهارة - طيب وصلهم تعزيتى و بعدين ان شاء الله لما حالتهم تتحسن شوية أكلمهم - بإذن الله - شد حيلك يا ميدو .. وربنا يصبرك ويصبر والديك واللى عندك كلهم - الله يكرمك يا أحمد - السلام عليكم - وعليكم السلام ورحمة الله وبركاته ............... نزار مات .............. تعالى اتعشى معانا يا أحمد .. الأكل جاهز واحنا كلنا ملمومين .............. نزار مات ........... الليل .... أول ليلة تعدى عليك فى القبر يا نزار...... الله يرحمك ويجعل قبرك روضة من رياض الجنة ............ نزار مات ............. يالا نكمل تربينة امبارح التربينة دى مالها .... 15 مرة بالانس Balance والفيبراشن Vibration مش راضى يقل عن 9؟؟؟ غريبة آخر مرة ... لو منزلش يبقى فى مشكلة تانى غير البلانس ............. نزار مات ............ هاكتب فى البلوج بتاعى عن الموقف ده .............. نزار مات ........... - التربينة خلصت وشغلتها - تمام - هتسافر؟ - مش عارف ... المهم عندى كان الغسل والجنازة .. وهم خلصوا بدرى قوى ........... نزار مات .......... م.صلاح اتصل وبيقول فى زيارة يوم الأربع وعايزك تقعد ما تنزلش يلعن .**** اهدا يا أحمد .. أنا قلتله تنزل عشان ظروفك وترجع يوم الاربع الصبح ............. نزار مات .............. م. صلاح اتصل تانى وقال الزيارة بقت السبت بعد بكرة .. استنى لما الزيارة تخلص وانزل بعدها ........... نزار مات ............ ما تيجى نلعب Winning eleven تعالى .......... نزار مات .......... أيوة يا أحمد... شد حيلك.. والله ما كنت أعرف الحمد لله على كل حال بابا عندكم دلوقت وماما بتكلمكم على التلفون... أنا متضايقة عشانك أنا عادى ... عايش .. بآكل وأشرب وأشتغل ... بس صوتك متضايق هم قالولك ليه؟ عشان لو ماكانوش قالوا كنت خربت الدنيا وقلت إنى كان ممكن أنزل وإزاى ما أحضرش جنازته بس انت مقدرتش تحضر ودلوقتى انت فى غربتك متضايق لوحدك مش لوحدى لا لوحدك الحمد لله على كل حال أنا بكيت عليك بجد .. أنا ما أعرفهوش بس بكيت عشانك انت وأنا أول دمعة تنزل من عينى دلوقت .. من ساعة ما عرفت ما بكتش ولا دمعة .......... نزار مات ......... الله يرحمه ويرحم موتانا أجمعين
" قد أظل أحبك طول العمر .. ولكنى سأتزوج من تصلح زوجة وأما لأولادى"
عبارة قالها الكثير من الرجال .. ونفذوها سواء برغبتهم أو رغما عنهم ..الواقع يقول ذلك .. والمنطق أيضا
فالحب ليس كل شئ .. هو جميل للغاية ..ويغمس نفسه فى كل شئ فى الحياة .. فيكسوه حلة من البريق والمتعة.. ولكن يبقى الحب عامل مساعد .. كالملح فى الطعام .. مهم للغاية .. ولكن لابد من وجود الطعام .. أليس كذلك؟
لا يمكن أن نتزوج لأننا نحب فقط .. فما إن نعتاد الحياة الجديدة ويقل تأثير الحب بأثر التعود حتى تزول غشاوة الحب ( مراية الحب عمياء) ونبصر كل العيوب التى لم نرها من قبل أو رأيناها وتغاضينا عنها ..
نظرنا إليها من فوق تلال الحب والشوق فرأيناها عيوبا صغيرة تافهة فلما تزوجنا وهبطنا من فوق التلال إلى السفح وجدناها صخورا مدببة تدمى الأقدام مع كل خطوة فى عمر الزواج.
أما الزوجة التى نخشى عليها ونحس أنها مظلومة كونها ليست التجربة الأولى فى حياة الرجل .. فنحن نتناسى أنها التجربة الأولى بالفعل .. التجربة الأولى فى الزواج..فلايمكن مقارنة الحب قبل الزواج بالحب بعده ..لايمكن مقارنة الاصطناع فى أغلب الأشياء إن لم يكن كلها بالواقع الحتمى .. هل أقارن إمرأة تزينت لعدة ساعات قبل أن أراها بزوجة استيقظت توا من نومها ؟؟ وعلى الناحية الأخرى لا يمكن مقارنة لمسة ليد حبيبة فى ظلام المعصية بلمسة الزوجة فى نور الحق..الشعور مختلف للغاية..
الأمر إذا حالات فردية .. بين رجل إختار زوجة صالحة يرتاح إليها وقطعا سيتحول الارتياح بالعشرة إلى حب .. وإن لم يكن بطغيان الحب الأول وفورة مشاعر الشباب ولكنه سيكون حبا هادءا متزنا..
وبين زوج ظالم .. اختار زوجة صالحة وعاش على ذكريات الماضى .. فظلم زوجته التى قطعا ستشعر بمكانتها فى حياة زوجها .. أهى عنده طعام بلا ملح أم هى وجبة شهية يتمناها دوما
أما الزوجة فغالبا ما تكون على علم بأنها ليست المرأة الأولى فى حياة زوجها .. ويبقى أسلوب تعاملها مع هذا الموقف .. هل ستحتويه وتتغلب هى أولا على هواجسها فتستطيع أن تأسر قلب زوجها لتحول علاقتهما من زواج فقط إلى حب وعشق؟
إن القلب إنما سمىّ بهذا الاسم اشتقاقا من صفة التقلب .. وقلب الرجل فى هذا المجال يغلب قلب المرأة التى فطرت على حب رجل واحد بينما الرجل أكثر قابلية لأن يقع فى أكثر من تجربة حب .. كلها صادقة .. ولكن بأحاسيس ومشاعر مختلفة .. لذا شرع الله التعدد للرجل ولم يشرعه للمرأة .. وقد إكتشف العلماء جينا وراثيا عند الرجل يظنونه سببا للتعدد .. وهو ينشط بدرجات مختلفة لدى بعض الرجال وليس كلهم.
لذا أنا مع اختيار الزوجة الصالحة التى يحس براحة معها .. لأنه لو كان صادقا مع نفسه وراغبا فى بيت سعيد فسيتحول الارتياح إلى حب بكل تأكيد.
أكرر أن الرغبة فى السعادة هى السر .. لدى الطرفين ..
بعض التجارب الشخصية أراها أمامى .. رجل تزوج بغير حبيبته .. قال لزوجته أثناء الخطوبة أنه يحبها وتم الزواج .. ولكنه برغبته عاش فى ماضيه .. وترك زوجته الصالحة لتربى أطفاله وخرج هو يعيد ذكريات الشباب ويثبت أنه مازال مرغوبا .. فعاشت إمرأته زوجة .. وعاش هو مراهقا .. تجربة فاشلة بكل المقاييس والسبب الزوج.
تجربة أخرى أصرت الزوجة أن الزوج لازال يخونها بناء على معرفتها بتاريخه قبل الزواج ... كان يحادث صديقه على الهاتف فأصرت على أنه يحادث إمرأة وقامت الدنيا ولم تهدأ حتى تركت منزلها وعادت إلى منزل إبيها أياما أحست فيها الفرق بين كونها زوجة وسيدة منزل وكونها إمرأة مهجورة بخطأ منها.
مثال ناجح لزوج تخطى ماضيه واختار زوجة صالحة .. أثمرت عن بيت من أكثر البيوت التى أعرفها سعادة .. فكلاهما تجاوز الماضى وعامل الآخر بما يرضى الله.
أنا فى الزعفرانة .. على آخر خليج السويس من تحت ... يعنى مبشوفش سينا .. المنظر قدامى كأنه بحر مش خليج .. المية على امتداد البصر .. ومفيش ى مبانى بينى وبينها.. والسما منظرها خرافة والصحرا من الناحية التانية تجنن .. يعنى كوكتييييل عجيييييب وفى منتهى الجمال
خالق الجمال ده كله أكيد أجمل .. والجميل من أسماء الله عز وجل .. بديع السموات والأرض .. يعنى خلقهم على غير مثال .. خلقهم وأحسن خلقهم ... وأحس كل شئ خلقه... سبحانه وتعالى وأنا جاى من الشقة على المكتب قبل المغرب بحوالى نص ساعة بصيت على منظر البحر والسما .. مفيش كلمة توصف جمال الطبيعة إلا " سبحان الله" خالق الجمال ده كله أكيد أجمل .. والجميل من أسماء الله عز وجل .. بديع السموات والأرض .. يعنى خلقهم على غير مثال .. خلقهم وأحسن خلقهم ... وأحس كل شئ خلقه... سبحانه وتعالى المنظر الجميل ده فكرنى إنى بقالى فترة مشفتوش... رغم إنى رايح جاى عليه ... بس مش بشوفه عشان عينى بقت تشوف عشان أعيش .. تشوف اللى لازم أعمله واللى لازم أبعد عنه... ضروريات الحياة يعنى ... الاسمتاع بالجمال عايز مش وقت طويل .. إنما عايز بال رايق..
ومنين ييجى روقان البال ... وانت عازب عايز تتجوز أو صاحب عيال.
افتكرت مقال قريته فى الدستور من اسبوع تقريبا ... عن بحيرة فى بلد فى أمريكا اللاتينية .. كانت مشهورة بسمك الزينة الرقيق الجميل .. وفجأة الناس لاحظوا ان السمك شكله بيتغير .. جماله بيقل وألوانه بتتغير وأسنانه بتكبر .. وابتدى يبقى أكتر شراسة ... طبعا دول ناس بتفكر فجابوا علماء عشان يشوفوا التحور ده حصل ليه .. عندنا طبعا انت عارف بنتصرف ازاى .. وبحيرة ناصر والسمك اللى فيها أكبر دليل .. المهم الناس اللى بتفكر وعنها علماء وصلوا للسبب ... البحيرة حصل لها تسريب من ممر مائى جديد ونزل فيها سمك عادى .. أكبر من سمك الزينة الموجود بشكل طبيعى فى البحيرة .. فسمك الزينة إضطر إنه يدافع عن نفسه وابتدى يتحور فى شكله وسلوكه زى ما قلنا .. دفاع عن النفس يعنى ... يعنى ضحى بجماله عشان يعيش ... فهمتوا الفكرة؟؟ ياتخشوشن وتحارب وتبلطج وتاخد حقك بدراعك ... يا تفرح بالجمال ..وتستنى الموت فى أقرب لحظة ... فى العلوم بيسموها نظرية البقاء للأقوى .. والبعض بيعدلها ويقول البقاء للأصلح .. يعنى تظبط أمورك .. العملية مش دراع بس .. دراع ومخ وقوة احتمال ... لازم تسايس أمورك عشان تعيش.. ساعة الخناق أسد وساعة الضرب تجرى أسرع من الفار وتكون أخبث من القطة وأنعم من التعبان ... كوكتيل حيوانى لازم عشان تعيش... انسى الجمال والحب والحق والخير ... إلا لو كانوا عدة الشغل .. البنت لازم تكون مزة عشان تشتغل أو تصطاد عريس .. والواد ممكن يبقى مز لو عايز يشتغل فى شركة ملتى ناشيونال.. أو عضلات عشان يعجب البنات ... الذكاء حسب الظروف .. يعنى قعدة ناعمة خليك ذكى على القد عشان الناس متطفش منك .. البنت الذكية قوى الولاد بيهربوا منها .. فلازم تعمل قدامهم ذكية نص ونص برضه .. رئيسك فى الشغل قلقان من ذكائك وطموحك .. يبقى تتغابى حبتين وتعمل كام غلطة صغيرة عشان يطمن .. ولازم تبجح لما تغلط .. آآآه طبعا .. خدوهم بالصوت ليغلبوكم .. لما تركب العربية امشى مخالف ودوس بنزين ع الآخر وقلب النور العالى عشان كله يكش ويوسعلك الطريق.. شغل الفردة لازم .. هتعمل مؤدب استحمل...
آآآآآآآه يا دنيا وآآآآآآآآآآآآآآآآآآآآآآآآآآآآآآآآآه يا بلاااااااااااااااااااااد
المشكلة ان العلماء اكتشفوا " احنا كنّا بنتكلم عن بحيرة أسماك الزينة لو كنتم نسيتوا" بقول اكتشفوا مكان تسريب المية وقفلوا الفتحة دى وقعدوا يغربلوا البحيرة قدر الامكان من السمك الدخيل عشان ترجع مكان آمن لسمك الزينة .. ونجحوا فى كدة تقريبا... بس العلماء برضه قالوا " إن السمك عمره ما هيرجع زى ماكان" اتحوّل لسمك مفترس إلى الأبد .. التحور تم واللى كان كان.. وقول للزمان ارجع يا زمان.
شفتوا فقد الأمان عمل إيه فى السمك الرقيق الجميل ... شفتوا السمك دافع عن نفسه ازاى عشان يعيش...
عرفتوا ليه بقينا كدة... ليه بناكل فى بعض فى الشغل والشارع والأتوبيس والقطر وفى الشارع وفى الشغل... عشان معندناش أمان ... عشان السمك الكبير اللى عمال يهاجمنا وياكل فينا .. اتوحشنا عشان نعيش ... بعنا الجمال والرقة عشان نعيش
رغم ان فترة الستينات كان فيها صعوبات مالية إلى حد كبير بس كان فيه ذوق عند الشعب .. كل الناس اللى عاشوا الفترة دى بيتحسروا على جمال الأخلاق والذوق اللى كان فيها.. إيه اللى حصل؟؟
انفتاح ... راجع أفلام وكتابات فترة السبعينيات تلاقى ان الانفتاح الاقتصادى كان معاه انفتاح رقابى وبالتالى حاب انفشاخ أخلاقى .. آسف على التعبير بس ده أقل وصف يتقال ..
وبعد السبعينيات ابتدت الحركات الدينية تقوم حبة .. وكل واحد وطريقته .. اللى فاهم دين ربطه بالذوق والأخلاق .. واللى مش عاجبه الحال والعصبية واخداه ابتدى سنة بسنة يروح ناحية التكفير .. وسنة كمان ابتدى الإرهاب..
وجت التمانينات والتسعينات بحصار أمنى كبيييير ... والناس مخنوقة وخايفة ومرعوبة بين الجماعات على اليمين والحكومة والأمن على الشمال .. والأوضاع الاقتصادية اتلخبطت كتييير من الستينات للتسعينات...
وهبااااااااااااااااا ... دخلنا ع الألفية ... الإرهاب اتحاصر وقل خااااااالص ... الأمن اتعدل ورجع لمهمته الكبرى والدائمة .. حماية النظام ... الخصخصة شغااااااااااالة على ودنه .. والناش شايفة بلدها بتتباع برخص التراب... الرقابة لسة -لامؤاخذة- مفشوخة الساقين .. وأصخاب الأخلاق أغلبهم سافر الخليج يدور على عقد عمل .... ولما ملقاش فايدة رمى الأخلاق فى أقرب صفيحة زبالة و... اشتغل..
النظام العالمى اشتغل ... حقوق الانسان والديموقراطية .. ورقة الكوتشينة اللى بتقش .. كارت فى ايد اميركا والغرب..
الصحافة المستقلة .. البيضا والسودة والصفرا والحمرا
الاتنين موصلين الناس ببعضيها ... وآآآآآآآآآآآآآه من دى توصيلة
متنساش ان أخلاقك كمجتمع من ساعة الانفشاخ اياه نزلت ومطلعتش .. زى الجنيه اللى جم يعوموه غطس ومقبش تانى..
الفاسد الصغنن فى السبعينات والتمانينات بقى على الأقل وكيل وزارة دلوقت ... يعنى بقى فاسد كبييييير .. وعشان ما يقعش وبرضه عشان الطيور على أشكالها تقع يبقى لازم يلم حواليه الفاسدين المتوسطين والفاسدين الصغيرين والفاسدين النونو..
يعنى الفساد بقى امبراطورية... والثقفين بيقولوا انه بقى دولة داخل الدولة .. بصراحة أنا شايف ان الدولة الصغيرة هى مصر والدولة الأكبر هى الفساد ... فسادنا - طبعا الحمد والفضل هنا مش لله - بقى عالمى ... نفتح مدارس فساد نعلم فيها الكبيروالصغير فى العالم .. ومتهيألى لو لقينا مخلوقات من الفضاء الخارجى برضه هيبقوا تلاميذنا فى مدرسة الفساد الاعدادية المشتركة .. الاعدادية لأنها بتعدك عشان تكون فاسد كبير مسلح بأحدث تكنولوجيات واستراتيجيات الفساد .
يتبقى الغلبان اللى أيام زمان كانوا بيقولوا عليه مواطن .. واحد لسة مقررش يبيع .. وأحيانا بيكون قرر بس مش لاقى حاجة يبيعها أصلا.. يعمل ايه الغلبان؟؟ يطلع همه فى اللى زيه .. يشتم سواقين العربيات .. يتخانق فى التباع .. وطبعا الاتنين (السواق والتباع يعنى )مخنوقين من بتوع المرور يقوموا مطلعين همهم فى اللى كان مواطن وتقوم خناقة ويروحوا الاسم اللى أكيد هيساوى بين الجميع .. فى الضرب على القفا.. ده لو كان المسؤول عن القسم انسان محترم .. لو غير كدة هم ونصيبهم .. أكتر من كليبات التعذيب دلوقت مفيش.
طب إيه آخرها ... الموت طبعا ... كلنا هنموت .. اللىبيفتكر كدة أكيد بيفتكر إنه هيتحاسب فبيلم نفسه شوية .. واللى باع القضية مسيره يتلم على إيد ملائكة العذاب..
غريبة ... الموت هو الحاجة الوحيدة اللى هتخلينا نعرف نعيش!!!!
* كيف علمت أننى هنا - كنت أرقب القمر فى السماء، وأخبرتنى النجوم أن القمر يجلس على شاطئ النهر * نعم، لطالما سهرت الليالى على شاطئ البحر أنتظرك - ولطالما سهرت الليالى أريد أن أختصر الدنيا فى ليلة أقضيها متطلعا لوجهك * مر عيد ميلادى ولم تقطف لى وردة، شغلتك عيون الصبايا عنّى - بل شغلتنى النجوم فاصطدت لك نجمة وخبأتها فى صدرى ثم سقيتها دم قلبى حتى توهجت كالحريق * وتركت ضلوع صدرك تحترق حتى راحت منها رائحة الشواء... هههه - لقد احترق صدرى بشوقى لك منذ أمد طويل، أمّا النجمة فقد صارت سوارا من اللؤلؤ المرصع بخفقات قلبى الذى سقاها * ما هذا؟سوار مرصع بالذهب والياقوت والفيروز..أنفقت مالك كله! ماذا بقى لك؟ - أنت.. وسهر الليالى * تسهر تقلب أوراقك وكتبك - وتجلسين بجوارى أستمد من عينيك شعرى ..ومن شعرك ألوانى .. ومن وجهك معانى الجمال فى كلماتى * وماذا تفعل بمالك؟ - أقدم مهرك لأبيك الشحيح حتى يرضى
************************ حوار مقتبس بتصرف من كتاب عن عمر الخيام
منذ عرفتك.. توقف قلبى عن الخفقان صارت كل شرايينى قلوب تنطق كل لحظة باسمك وفى هواك تذوب عرفت قبل ميلادى أن هواك هو المكتوب فاستمرأت ذل حبك ما حاولت منه هروب توقفت عينى عن الرؤية وعشقت صورتك تمردت أذنى على الأصوات مكتفية بهمستك ما عادت يدى تشعر إلا بلمستك كلما أمسكت وردة فاح منها عبيرك غيرت عروقى مواقعها لتكتب - بطول الجسد - اسمك واحتار دمى أين يسرى فسرى فى نهر حبك
ومين مش عايز يتجوز.. بصراحة كنت فكرت أعمل مدونة بالاسم ده وأرد بيها على مدونة عايزة أتجوز وأعرض وجهة نظر الرجالة فى الموضوع ده .. لكن تراجعت لعدة أسباب أولها غرورى رفض فكرة إنى أكون نسخة رجالى من مدونة حريمى .. مش قصة راجل وست بس قصدة ان الفكرة مش بتاعتى وأنا مش بحب أقلد أو أكون رد فعل لحد.. مع إن الفكرة مغرية جدا بصراحة لتميز مدونة غادة وأسلوبها الرائع . السبب التانى كونى كولد محترم ( ما أنا شتمت نفسى فوق يبقى لازم أردلها اعتبارها هنا) مش بلعب ببنات الناس ولا بدخل فى قصص حب وارتباط ملهاش لزمة.. وبالتالى معديش غير حكاية أو اتنين أحكيهم والباقى يبقى على حكايات المعارف والجيران.. السبب التالت كان تحصيل حاصل وهو إنى وأنا بكتب البوست اكتشفت مدونة عملت نفس الفكرة .. واللى سبق كل النبق .. وبالهنا والشفا بنية صافية لأنى كنت أخدت قرارى بالفعل.. لكل هذه الأسباب مجتمعة (على خلاف عادتنا كعرب) قررت أكتب البوست ده ألم بيه الموضوع فى كام كلمة صغيريين .. عايز أتجووووووووووووووز... وماله شوية وتخف يا حبيبى.. لا بجد عايز أتجوز.. من زمان اللى حواليا فاقوا لما عديت ال25 سنة وابتدوا يتكلموا .. ودلوقت الضغط بيزيد عليا عشان أتجوز... أصحابى استغربوا لما قلت من سنتين : " كفاية ... عازي أتجوز بقى" واحد قال :" يااااااااااه .. أخيرا يا أحمد قلتها" اكتشفت انى كنت كاتم فى قلبى وساكت من زماااااان. زمايلى بيقولوا ياللا انت كبرت وده وقته .. إيييييييييه .. مناوتش ..... فيه إيييييييييييه .. إنت مش ناوى... مااااااالك؟؟؟ مش لاقى عروسة حلوة؟؟ وهكذا يعنى.. البيت بقى مكنش عايز يفتح على نفسه فتحة لاعتبارات أسرية ومادية .. فسابنى فحالى لغاية ما اتكلمت . وطبعا هنرجع للبيت بعدين .. لأن إذا كان الكل قال اتجوز بعد ما عديت ال25 سنة ففى حاجات فكرت فيا وطالبتنى بالجواز قبل الناس كلها بعشر سنين على الأقل ...هرموناتى طبعا... حبايبى هرموناتى دول ... مش مقصرين معايا وقايميين بالواجب .. والله نفسى أردلهم جزء من جمايلهم عليا بس العين بصييييييييرة (بصيرة جدا فى شوارعنا التحفة دى ولبس بناتنا اللى بيتعلموا الحترام يوم بعد التانى ) والإيد قصييييييرة (ممكن تطول بسهولة بس حوائط الصد تمنعنى من كدة (الدين والعقل والأخلاق) مش هطول فى موضوع الهرمونات عشان أنا مؤدب حبتين وعشان مسببش إحراج لأخواتى المؤدبين اللى زى حالاتى.. بعد الهرمونات جت المشاعر تقولى اتجوز.. أصل الجواز مش حوار هرمونى خالص .. برضه المشاعرموجودة .. وهى الأهم باستمرار .. يمكن الهرمونات صوتها عاااااااالى قوى خصوصا عند الرجالة .. بس المساعر مستمرة 24 ساعة فى اليوم .. الهرمونات انت وظروفك وبلاش السيرة دى عشان لسة من يومين ناس كانت بتحكى على ناس تانى هرموناتهم مش مساعداهم وبيلجأو للمساعدات الخارجية .. وسمع أحلى نكت وافيهات على الرجالة اللى أكلنا المسرطن والمهرمن والمورثن (نسبة للسرطان والهرمونات والهندسة الوراثية يعنى ) مسح بيهم الأرض ..وربنا يستر علينا أجمعين المهم أنا عايز أتجوز عشان ألاقى حد تهمه كل حاجة تهمنى ..أو على الأقل 99% .. أو خليها 80% عشان ال99% محجوزة للحزب الحاكم دائما فى ى انتخابات .. الله يرحم أول حائز على 99.99% .. ومش عارف مين اللى نزله 0.01% .. تقريبا حد مات قبل ما ينتخب وطلعلهم ... .. أيوة لسانه .. متودوناش فى داهية انا عمال اطلع برة الموضوع ليه ... نرجع مرجوعنا "ومتسألنيش يعنى إيه" ونقول ان الجواز مهم جدا للاستقرار النفسى والمشاركة الوجدانية .. اللمسات الرقيقة والهمسات اياها .. على أغنيتين لعبدالحليم وتاخدها فى حضنك ونتوا بتتفرجوا على فييلم رومانسى .. ولما العملية تطلب والمشاعر تفتح سكة للهرمونات سواء بمزاجها أو غصب عنها.. تروح مشغل فيلم رعب عشان المدام تكلبش فيك أكتر لغاية ما الهرمونات تشوف شغلها وتطفى التلفزيون خالص ... أو تعليه عشان يدارى الصوت .. كل واحد وظروفه سبب مهم برضه لرغبتى الملحة فى الجواز ... عايزها تدعكلى ضهرى ... ايه اللى يقرفنى وتعبنى وأقعد ألف ايدى وأتنى وسطى .. ناقصة هي ألعب أكروبات بعد ما أنزل من التربينة؟؟؟ نرجع للبيت اللى سابنى لغاية ما اتكلمت .... سوفوا الموضوع للأسباب السابق ذكرها (عارف ان مقلتهاش بالتفصيل .. ومش هقولها)... المهم ..اتكلمت وقالوا طيب وحاضر وبعدين .. ولما الأوضاع استقرت شوية وبعد الحاح منى رحت أتقدم... وعينك متشوف إلا النور..البيت كله عايزنى .. ماعدا أبوها مزمزق.. خلاف قديم مع بابا.. قعدنا نتكلم ويادوب دقيقتين بالكتير حسيت انى على شط القناة فى 5 يونية 1967.. يعنى الضرب تحت الحزام وانت مسلم النمر جاهز..البيه فرصته جت لغاية صالة بيته عشان ينتقم .. وبابا اللى كان عاصر على نفسه قفص ليمون عشان خاطرى وبالعافية وافق يروح.. طبعا الاتنين بيحاربوا .. واللى بيخسر أنا والبت الغلبانة اللى طار من ايديها عريس لقطة وزى العسل زيى.. الواحد مبيحبش يتكلم ولا يشكر فى نفسه كتير الراجل ( مش عايز أشتم وأقول لفظ بديل ينفى عنه الرجولة من أساسها) طلب شقة تمليك فى وسط البلد ( كانت أياميها تعمل 300000 جنيه أيون .. تلتميييييت ألف . .. والشبكة دى حاجة ترجع لذوقى .. والعفش دة حاجة فبيتى .. والمهر براحتى ... والمؤخر 50000 أيون كمان مرة .. خمسين ألف جنيه وهو مش هيجيب فتلة فى إبرة ومافيش خطوبة أساسا .. أجهز نفسى وأروح اتجوز فى يومين أو اسبوع بالكتير.. الرجل عداه العيب.. طلباته كلها يا دوب تعملها 400000-500000 أيوننننننن أربعيييييييييييت خمسميييييييييييييييييت ألف تحتوح (كان لحلوح لما كان بيلحلح المسائل ... بقى تحتوووووووووووح لما بقى تحت الجزمة .. أوووه سورى ي جماعة .. قصدى تحت الشوز) تخيلوا بقى رد فعل بابا (وافتكروا قفص اللمون اللى كان عاصره على نفسه لمجرد انه يدخل بيت الراجل ويسلم عليه) .. ما علينا من التفاصيل طبعا الموضوع اتفركش إلى الأبد .. للأسباب الشخصية مش المالية .. أينعم مكنتش هلم الخمسمييييييييييت ألف تحتوح بس الراجل كان لامؤاخذة بيتدلع وقلل طلباته بعدين .. المشكلة ان النفوس وقفت ... وبابا رفض يروح تانى..تقريبا قفص اللمون خلص . ايييييييييييه .. دنيا ... ولما بعد شويتيين لملمت نفسى وقلت أجرب أدخل دنيا زى ما بيقولوا ..لقيت الموضوع بقى أصحب لأسباب مش هقولها (كنت قلت الأسباب القديمة عشان أقول الأسباب الجديدة).. سبب واحد ممكن أقوله وهو إن قزازة الزيت النص كم بقت ب 10 جنيه.. بصراحة من ساعتها مسألتش على زيت الزتون بقى بكام. المهم أنا لسة عايز أتجووووووووووز .... ومستنى شهر سبعة عشان مرتبى يزيد عشرتاشر % وأعرف أعمل بيت وأجيب واحدة تنكد عليا فيه
المشاركات
