الخميس، ٤ ديسمبر ٢٠٠٨

Play Station

لو سمحت أنا عايز أرحل أيام من الـShift ده وأعوض بعد العيد إن شاء الله

انت عارف إن ده معناه إنك تقعد شهر فى البيت

أيوة ، بس أنا كدة هاقعد شهر بعد العيد .. بس أنا عندى 4 أيام أجازة هاخدهم فى وسط الشهر ده

مش عايز أقولك لأ بس مينفعش أقول آه

شكرا ، أنا هسافر للشغل قبل المجموعة بدرى وأنزل بدرى ، ولو فى فرق أيام هابقى أعوضهم بعد العيد

ماشى

( طبعا الحوار مع مديرى اللى أنا متأكد إنه ممكن يمشى الموضوع لو عايز)

****

الزعفرانة

هتعملوا إيه النهاردة

هنغير المولد للتوربينة 67 ألمانى 2

بس أنا كلمت الألمان وقالوا إن العيب فى جزء الـVRCC بس، يعنى مش لازم نغير المولد كله

دى تعليمات المدير العام

نتصل بيه ونناقشه

كان من زمان

طيب أطلع معاكم

لو احتجناك هنتصل بيك

*****

غرفة التحكم

فين الناس؟ الدور كله فاضى

أكيد طلعوا شغل

كلهم؟! حتى اللى ماسك الوردية؟ طيب أنا فى مكتبى لو حد عايز حاجة

*****

نشوف الكمبيوتر أشغل بنامج تعليم انجليزى ، وأعمل scan للفيروسات... زهقت

طيب نشغل اغانى أجنبى .. بقالى كتير ماسمعتش أغانى .. وطبعا مش هسمعها كدة .. لازم ألعب Winning11

لذيذة قوى اللعبة دى .. أحسن من الـ FIFA .. كالعادة كل ألعاب الكمبيوتر والـ PlayStation عندى بتمر مرور الكرام وتبقى ألعاب كرة القدم هى الصديقة الدائمة عند الملل

أختار الميلان وألاعب اليوفى ( اليوفنتوس أو السيدة العجوز) وطبعا أختار أعلى درجة صعوبة.. مفترى من يومى

يبتدى الماتش .. ضاغطهم فى نص ملعبهم .. وتشكيل جبار فى أرض الملعب .. وتنويع فى الهجمات يمين وشمال ومن القلب .. وفجأة .. هجمة مرتدة لليوفى .. وجون ... يا سلام .. أول هجمة ليهم بجون؟؟

****

عايز أخطب

أصبر شوية ... لسة بدرى

لغاية إمتى بدرى؟؟

****

أباصى الكورة .. هات وخد .. حلوة الترقيصة دى .. اتقطعت الكورة .. غريبة .. المدافع ده جه منين؟

****

غريبة يا أحمد ، مدير مكتب رعاية الطلاب بيقول إنك أجندة نشاط ومن حقك تدخل أى لجنة تختارها سواء أسر أو رياضية أو جوالة ، ورغم كدة رافض إنك تدخل الاتحاد

أصلى اتكلمت آخر السنة اللى فاتت وطالبت بحقنا فى جائزة الأسرة المثالية .. وأكيد قال إذا كنت باتكلم وأنا طالب عادى يبقى هاعمل إيه لو دخلت الاتحاد

وهتعمل إيه

مش و اختار القاعدة بالتزوير ومظبطها للناس بتوعه .. أنا مشيت خمسين متر بس جوة الكلية كسبت 6 أصوات من 10 غصب عنه .. وأديها جت غصب عنه

رئيس اتحاد الطلاب المنتظر:يا أحمد أنا محرج منك قوى بس الموضوع فى وشى .. أنا اللى اخترت القاعدة ومدير الرعاية مشى كلامى عشان ينتخبوا اللى هو عايزهم ودلوقت انت لخبطت حساباته كلها ، إنت صاحبى وعشان خاطرى متحرجنيش

منافسى الأول : يا أحمد أنا فى بكالوريوس ومعنديش فرصة تانى أدخل إتحاد .. لازم أدخل السنة دى.

منافسى الثانى :يا أحمد كل الناس عارفة من السنة اللى فاتت إنى هأمسك اللجنة الرياضية .. وشكلى هايبقى بايخ قوى وسط الكلية وزمايلى لو مدخلتش الاتحاد

ارتاحوا كلكم .. باى باى يا اتحاد .. بس بمزاجى وبعد ما كسبت غصب عنكم وعن تزويركم فى الانتخابات

****

يوووووووه ... الجون التانى دخل .. مستحيل النحس ده .. هجمتين ليهم بجونين ؟؟

نلعب ماتش تانى .. نبص على الـsettings .. تمام .. التحكم فى تغيير اللاعبين manual عشان الحركات البايخة بتاعت الكمبيوتر .. أبقى بتزحلق بمدافع يغير هو تلقائى على مدافع تانى وألاقينى لبست بنالتى (ضربة جزاء) بدون ذنب .. المهم الماتش ابتدى وسيطرة زى الماتش الأولانى وقبل نهاية الشوط الأول يطلعوا كالعادة بالهجمة المرتدة ويجيبوا جون .. المشكلة المرة دى إن رغم التحكم الـ manual اللى بيدينى تحكم أكبر فى اللاعبين إلا إن حارس المرمى وبغرابة شديدة طلع لغاية خط الـ18 ومهاجم الفرقة التانية دخل الكورة بمنتهى السهولة

يعنى أعمل إيه تانى عشان أخلص من التفاهات والأخطاء الفردية دى؟

****

عربيات من دى

رئيس الهيئة والنائب

تمام أخيرا هأقابلهم

رايح فين .. الكل بيهرب من قدام الريس .. نازل سلخ فى الكل

لازم اتكلم .. الساكت عن الحق شيطان أخرس

*****

السلام عليكم .. أحمد على .. مهندس صيانة

أهلا طلباتك إيه؟

الموقع هنا من أحسن المواقع على مستوى العالم فى خصائص الرياح

الحمد لله .. دى حاجة كويسة

بس مالناش يد فيها .. دى نعمة من ربنا .. المفروض إننا نستثمر النعمة دى ونشتغل صح.. نختار نوع توربينة كويس وفريق صيانة كفؤ وأدوات وقطع غيار مظبوطة

الكلام ده عارفينه ومالكش دعوة بيه .. طلباتك إيه

ماينفعش النوبينات تقف كام شهر عشان نوع زيت ناقص وأول ما تشتغل تقف تانى عشان نوع شحم ناقص

مالكش دعوة .. طلباتك إيه

عندنا خامات كويسة سواء مهندسين أو فنيين والمفروض يتدربوا عشان مستواهم يرتفع

ماتتكلمش عن حد .. اتكلم عن نفسك بس.. طلباتك الشخصية

عايز أتدرب على تحليل الـ Vibration وفحص الـ Gear Box

طيب ... اسمك إيه

أحمد على (مع إن إسمى كان أول حاجة قلتها)

*****

مش نافع كدة ، مالها منحسة النهاردة؟؟ اتغلبت ماتشين واحد - صفر واتنين – صفر ، طيب نلعب التالت ونشوف آخرتها

ياسلام ... أول جون أجيبه النهاردة .. وإيه فى أول 5 دقايق .. جون ملعوب تمام .. Throw وبعديه انفراد ولعبة بحرفنة Loop من فوق حارس المرمى .. الانتقام قادم أيتها العجوز (لقب فريق اليوفنتوس هو السيدة العجوز)

يااااه ... واحد – واحد .. بصراحة جونهم المرة دى ملعوب .. كدة ما أزعلش .. نكمل لعب .. أيوة كدة جون تانى ليا وتبقى النتيجة 2-1 .. يالا شد حيلك يا حمادة لاوم حماس وإصرار

*****

عايز أسيب الشغل

إعقل يا بنى .. حد طايل ؟ دى حكومة

ما هو هشان حكومة .. مافيش شغل صح ، ولا فى فلوس كمان .. وعايزينى ما أفكرش وأربط الحمار مطرح مايقول الحمار

وماله.. ماتربطه مكان ما يقولولك

أنا مهندس مش عربجى .. وبعدين عايزينى ألغى دماغى على الأقل يدفعوا التمن .. إنما أبيع شهادتى ودماغى عشان ألف جنيه فى الشهر ؟؟ دى البيعة تبقى خسرانة قوى

*****

اتنين – واحد ليا وخلاص الماتش هيخلص بعد عشر دقائق

ايه الملل ده .. ليه فجأة كدة فقدت الحماس والاهتمام وهم طبعا ما بيستنوش .. اتعادلوا

أفوق .. ياترى ألعب ولا بلاش .. أحاول أكسب ولا مش فارقة

لا .. هالعب عشان أكسب .. أنا بكره الخسارة فى حد ذاتها

أضغط ... أقطع الكرة .. أباصى .. تتقطع .. أخطفها تانى .. أعدى من واحد والتانى .. كانت هتطلع أوت ولحقتها وعدلت وشى على جوة الملعب ودخلت على الـ 18 طلع مدافع من تحت الأرض وقطع الكورة بس جبتها تانى وغيرت الملعب للجنب التانى ورفعت الكورة ولعبة بالهد (بالرأس) جت فى العارضة .. ده وقته؟؟ كورنر أرفعه وتطفيشة على نص الملعب .. ويصفر الحكم

الماتش تعادل ... تلعب إكسترا تايم؟؟

****

نصيحة خليك فى الهيئة لغاية ما القطاع الخاص يبتدى شغل فى موقع جبل الزيت وساعتها مرتبك هيرتفع كتير قوى وهتكون عندك خبرة 4سنين على الأقل فى مجال الرياح وانت هنا من الناس الكبيرة اللى شايلة شغل .. ومين عرف

ولغاية ما يعدوا السنتين ولا التلاتة دول أعمل إيه ؟ لافلوس ولا راحة نفسية ولا جواز

انت الحمد لله عندك مشروعين شغالين .. مكتبة وشركة ADSL ودول يسندوك شوية

المشروعين لسة محتاجين سنة أو اتنين على الأقل عشان أقدر أخد منهم دخل يساعدنى

اصبر

المشكلة انى عندى 29 سنة .. يعنى آخر الشباب .. بعد كدة يبقى بلعب فى الوقت الاضافى .. على العموم ربنا يكتب اللى فيه الخير

*****

تلعب وقت إضافى ولا تنهى الماتش تعادل؟

طبعا ألعب .. مش بحب الهروب ولا الحلول السهلة

أول دقيقة فى الوقت الإضافى .. أسيب الـ Joy Stick و أعدل السماعات على ودانى عشان أسمع أغنية Hero لـ Enrique Iglasius يقطعوا الكورة ومقدرش أستردها لغاية مايجيبوا جون .. تلاتة اتنين ليهم

*****

المشكلة إن الأغنية بتقول I can be your hero .. ممكن يكون حبيبها .. بطلها ... ممكن ..بس مش هو البطل .. أو على الأقل لسة مابقاش البطل .. فى حاجات مانعاه .. ممكن يكون فارس .. بس ذنبه إنهم كسروا سيفه ... قتلوا حصانه ... سرقوا حلمه

******

ملعب نادى الاتحاد السكندرى

عايز أعمل إختبارات يا كابتن

الاختبارات ميعادها خلص

أنا من المنيا مش من اسكندرية ومكنتش أعرف المواعيد

طيب تعالى يوم الخميس الجاى

******

انت كويس يجى مكن .. بس انت من المنيا .. وكلية هندسة كمان

ممكن أحول على هندسة اسكندرية والشقة موجودة

بس برضه هندسة محتاجة تركيز والتزام .. هتختار الكورة ولا الكلية؟

الكلية يا كابتن (بعدها بسنة ولا اتنين رضا عبد العال خد650ألف جنيه فى الموسم وبعده العملية فتحت على البحرى)

*****

لسة ضاغط على الفريق المنافس .. وللأسف الشوطين الإضافيين خلصوا من غير ما أقدر أتعادل ... 3 هزايم فى 3 ماتشات مع العلم إنى متسيد الماتشات باكتساح فى الملعب .. نحس ؟ حظ .. نصيب ؟

طيب كمان محاولة ولا كفاية؟ تغير الفرق ولا تخرج من اللعبة كلها؟

وده برضه سؤال؟؟ طبعا هألعب وبنفس الفرق

يا رب .. انصرنى على الكمبيوتر ...على اليأس والإحباط وعلى الشغل والمكتبة والنت والناس .. ..وعلى نفسى

****

(ملحوظة : تفاصيل المباريات حقيقية وليست من خيالى ، وقد لعبت المباراة الرابعة .. وكنت متقدما بهدف حتى العشر دقائق الأخيرة .. وفجأة .. RESTART)

هناك تعليقان (٢):

كرانيش يقول...

لا برافو عليك

عرفت تدخل تفاصيلك ف تفاصيل اللعبه
وعرفت تربط بينهم كويس
وده شىء يحسبلك بجد
انى انتقل من تفصيله خاصه بامر ما لتفصيله تانيه خاصه بامر مختلف تماما من غير مااحس بمطبات ولا احس انى وقعت فى النص
ده اكيد يبقى شىء كويس جدا

دمت مبدعا يا انت

أحمـــــد علـــــــى يقول...

شكرا لك يا أنت (ده تشابه فى الأسماء)
ويا رب دايما مبسوطة وفرحانة وحياتك مليانة كرانيش ملونة