الجمعة، ٩ مايو ٢٠٠٨

فراق

أنا فى الزعفرانة .. الساعة عدت اتنين ونص بالليل .. لسة نايم من أقل من نص ساعة .. عندى شغل الصبح .. الموبايل يرن .. أصحى من النوم .. متوجس خيفة كالعادة .. ما هى دى لعنتى .. الهواجس والخوف ... اسم أختى على شاشة الموبايل ... الهاجس بيكبر ....
- السلام عليكم
- وعليكم السلام يا أحمد ( صوت ماما .. بتحاول تخليه طبيعى)
- أيوة يا ماما .. خير
- خير بإذن الله ... إنّا لله وإنّا إليه راجعون .. وكلنا لها
- مين يا ماما
- نزار مات ...
- إيه .. نزار ... إنّا لله لله وإنّا إليه راجعون .. الله يرحمه .. إمتى؟
- لسة دلوقت .. مخرجش من المستشفى
- حادثة ولا إيه اللى حصل ؟؟
- لأ .. تعب ودخل المستشفى
- الله يرحمه .. هيدفنوه إمتى؟
- لسة مخرجش من العناية .. وأبوك ومصطفى لسة على باب المستشفى ومش راضيين يدخلوهم.
- الله يرحمه .. ويصبر أهله.. السلام عليكم.
...........
نزار مات
...........
- السلام عليكم
- وعليكم السلام ورحمة الله وبركاته
- أيوة يا مصطفى ... انت فى المستشفى دلوقت؟
- على الباب ومش راضيين يدخلونا
- ايه اللى حصل ؟
- تعب دخلوه العناية المركزة صرخ ومات
- الله يرحمه مين جنبك
- بابا وعلاء ( خال نزار)
- هات علاء أعزيه
- منهار ومش هيقدر يكلمكك
- الله يصبره .. هات بابا
- السلام عليكم
- وعليكم السلام ورحمة الله وبركاته .. إنّا لله وإنّا إليه راجعون
- أعظم الله أجرك
- شد حيلك يا بابا .. عزيهم كلهم ... هأحاول أنزل عشان أحضر الجنازة
- ماشى يا أحمد ... السلام عليكم
..............
نزار مات
............
- السلام عليكم يا هانى ( ابن خالة نزار)
- وعليكم السلام ورحمة الله وبركاته
- انت فين يا هانى
- انت بتتصل عادى ولا فى حاجة يا أحمد
- أنا عرفت يا هانى .. انت وصلت ولا لسة
- لا .. لسة فى الطريق
- شد حيلك .. أعظم الله أجرك
- كله بأمر الله
- لما توصل عزيهم بالنيابة عنى لغاية ما أنزل
- ماشى يا أحمد
...........
نزار مات
..........
- السلام عليكم يا أحمد
- وعليكم السلام يا زهراء ... شدى حيلك ( أختى .. أكبر منى بسنتين ونص ...من سن نزار)
- الله يرحمه
- كله بأمر الله .. لله ما أعطى ولله ما أخذ ولله ما أبقى (أكتر واحدة حاولت أهديها .... عارفها حساسة .. ونزار صديق الطفولة الوحيد تقريبا .. مفيش صداقات برة العيلة .. حتى فى الطفولة)
- أروح المستشفى يا أحمد؟
- براحتك يا زهراء .. بس مفيش كلام يغضب ربنا ... ابكى براحتك
- لا ياأحمد .. ما انت عارف
- عارف إن أول ما بنشوف الميت أو الجنازة ناس كتير بينهاروا .. خصوصا الستات.
- أنا عايزة أودعه يا أحمد
- خلاص روحى .. خدى ماما وروحوا .. بس من غير ما تعملى أو تقولى حاجة تغضب ربنا
- إن شاء الله
- شدى حيلك
- الله يرحمه
- آمين
...............
نزار مات
..............
دعيت على قد ما ربنا قدرنى .. وفكرت أسافر دلوفت .. أصحى حد من سواقين الموقع وأقوله عندى ظروف .. ياخدنى لكمين الزعفرانة واستنى أى حاجة نازلة على الكريمات وأسلمها لله ... فكرت نمت أثناء التفكير ... غصب عنى من التعب .. كان بقالى يومين تقريبا ما نمتش .. أو بمعنى أصح بقالى 5 أيام مواعيد نومى متلخبطة مع شغل كتير .. مش عذر كفاية إنى ما أسافرش .. بس ده اللى حصل
.........
نزار مات
.........
فى المكتب
- السلام عليكم يا سعيد
- وعليكم السلام يا أحمد .. لسة برن عليك فى الشقة عشان اتأخرت
- عادى .. احتمال اسافر دلوقت
- ليه ؟
- عندى حالة وفاة .. ابن بنت عمتى
- عندة كام سنة ؟
- أكبر منى بسنتين ونص
- الله يرحمه ..
- المسيرى فين؟
- تلاقيه فى المكتب التانى
........
نزار مات
..........
- السلام عليكم يا زهراء
- وعليكم السلام ورحمة الله وبركاته
- هيدفنوا امتى
- خلاص يا أحمد
- خلاص إيه
- دفناّ ورجعنا خلاص
- انت معاهم دلوقت
- أيوة
- مين جنبك؟
- زينب
- هاتيها
..........
نزار مات
.........
- السلام عليكم يا زينب ( خالة نزار .. بنت عمى)
- وعليكم السلام ورحمة الله وبركاته... ازيك يا أحمد
- ازيك انت ... عاملة إيه
- الحمد لله..
- شدى حيلك ... إنّ لله وإنّا إليه راجعون
- كلنا لها يا أحمد .. محدش قاعد
- الله يصبركم جميعا .. وخصوصا أبوه وأمه .. هى جنبك أكلمها ؟
- مش هينفع يا أحمد..
- طيب إبقى عزيها ... الله يصبرها
- الله يرحمه
- عايزة حاجة؟
- الله يكرمك يا أحمد
- السلام عليكم ورحمة الله وبركاته
- وعليكم السلام ورحمة الله وبركاته
...............
نزار مات
...........
السلام عليكم يا مسيرى
وعليكم السلام يا أحمد .. تربينة واحد ألمانى مستنياك
- أنا عندى حالة وفاة واحتمال اسافر
- خلص التربينة وسافر
...................
نزار مات
...............
- لا مؤاخذة يا باشمهندس .. هزرت معام ومكنتش أعرف والله
- ولا يهمك يا أسامة .. عادى ( أسامة أحب سواق ليا فى الموقع .. وأكتر واحد بيهزر معايا)
- شد حيلك ..
- إنا لله وإنا إليه راجعون
............
نزار مات
..........
- الهوا ضعيف .... هنكمل شغل بكرة
............
نزار مات
........
- أنا طالع الشقة ... لو الهوا سرعته زادت قبل المغرب اتصلوا بيا
- ماشى
..........
نزار مات
........
- السلام عليكم يا بابا
- وعليكم السلام ورحمة الله وبركاته
- انت فى العزاء؟
- أيوة ..
- إدينى أى حد جنبك أكلمه
- خد نبيل
...........
نزار مات
.........
- السلام عليكم يا نبيل ( خال نزار ....وابن عمى)
- وعليكم السلام يا أحمد
- شد حيلك ... إنّا لله وإنّا إليه راجعون
- بمكسيبتلااب ( شوية كلام ما فهمتوش) ( حاسس ببرود ناحيتى)
- كله بأمر الله يا نبيل
- يبتنللانسلبنشي ( همهمة مش مفهومة)
- ادينى علاء يا نبيل
..........
نزار مات
.........
- السلام عليكم يا علاء
- وعليكم السلام ورحمة الله وبركاته ( نفس برود أخوه)
- شد حيلك ... كله مكتوب
- الحمد لله
- .................
- .............
- حد جنبك أعزيه يا علاء؟
- حد مين .. عايز تكلم مين؟
- أبوه جنبك؟
- لا .. ومش هينفع تكلمه
- طيب ادينى أى حد من العيلة
- ميدو جنبى .. تكلمه ( أخو نزار الصغير.. ابن بنت عمى)
- هاته
................
نزار مات
...........
- السلام عليكم ورحمة الله وبركاته
- وعليك السلام ورحمة الله وبركاته
- شد حيلك يا ميدو ... إنّا لله وإنّا إليه راجعون
- الحمد لله يا أحمد ... الله يرحمه ( فى صوته إحساس بشرى ...أول واحد بيحس فى المكالمة دى)
- اللى عند ربنا أحسن من اللى عندنا يا ميدو .. وربنا أرحم بيه مننا
- ونعم بالله ... أيوة يا أحمد ... الحمد لله قوى .. دة رحمه
- مش الحمد لله مات موتة كويسة ..
- آه والله ... وشه كان منور وبيضحك زى ما يكون صاحى
- الحمد لله ... شفته قبل ما يتكفن
- آه .. كنت آخر واحد شلته أنا وخالته رجاء ( صوته ابتدى يتهدج .. وهيبتدى البكاء)
- طيب الحمد لله يا ميدو انك اطمنت عليه .. احنا عايزن ايه غير الوش الأبيض والابتسامة والشهادة عند الموت
- الحمد لله
- يا ميدو الحمد لله ربنا مصبرك .. بس موت الابن تقيل قوى عند الأب والأم...
- أيوة هما منهارين
- خليك جنبهم ... وحاول تصيرهم وقولهم زى ما انت لسة قايل.. الحمد لله على حسن خاتمته وربنا يصبرهم ويديهم أجرهم .. الجنة لو صبروا يا ميدو
- إن شاء الله يا أحمد .. كتر خيرك
- كتر خيرى ازاى يعنى؟؟ ده أنا مقصر .. والمفروض أنزل
- لا والله ما تتعب نفسك .. أنا عارف ظروف شغلك واسفرك
- برضه المفروض أنزل .. بس للأسف الجنازة عدت عليا .. اتصلت الصبح قالولى دفنّنا ..
- خلاص يا أحمد متتعبش نفسك
- ممكن أكلم والدك ؟
- لا ... هينهار أكتر
- ووالدتك ؟
- هى فوق فى الشقة وبرضه منهارة
- طيب وصلهم تعزيتى و بعدين ان شاء الله لما حالتهم تتحسن شوية أكلمهم
- بإذن الله
- شد حيلك يا ميدو .. وربنا يصبرك ويصبر والديك واللى عندك كلهم
- الله يكرمك يا أحمد
- السلام عليكم
- وعليكم السلام ورحمة الله وبركاته
...............
نزار مات
..............
تعالى اتعشى معانا يا أحمد .. الأكل جاهز واحنا كلنا ملمومين
..............
نزار مات
...........
الليل .... أول ليلة تعدى عليك فى القبر يا نزار...... الله يرحمك ويجعل قبرك روضة من رياض الجنة
............
نزار مات
.............
يالا نكمل تربينة امبارح

التربينة دى مالها .... 15 مرة بالانس Balance والفيبراشن Vibration مش راضى يقل عن 9؟؟؟ غريبة
آخر مرة ... لو منزلش يبقى فى مشكلة تانى غير البلانس
.............
نزار مات
............
هاكتب فى البلوج بتاعى عن الموقف ده
..............
نزار مات
...........
- التربينة خلصت وشغلتها
- تمام
- هتسافر؟
- مش عارف ... المهم عندى كان الغسل والجنازة .. وهم خلصوا بدرى قوى
...........
نزار مات
..........
م.صلاح اتصل وبيقول فى زيارة يوم الأربع وعايزك تقعد ما تنزلش
يلعن .****
اهدا يا أحمد .. أنا قلتله تنزل عشان ظروفك وترجع يوم الاربع الصبح
.............
نزار مات
..............
م. صلاح اتصل تانى وقال الزيارة بقت السبت بعد بكرة .. استنى لما الزيارة تخلص وانزل بعدها
...........
نزار مات
............
ما تيجى نلعب Winning eleven
تعالى
..........
نزار مات
..........
أيوة يا أحمد... شد حيلك.. والله ما كنت أعرف
الحمد لله على كل حال
بابا عندكم دلوقت وماما بتكلمكم على التلفون... أنا متضايقة عشانك
أنا عادى ... عايش .. بآكل وأشرب وأشتغل ...
بس صوتك متضايق
هم قالولك ليه؟
عشان لو ماكانوش قالوا كنت خربت الدنيا وقلت إنى كان ممكن أنزل وإزاى ما أحضرش جنازته
بس انت مقدرتش تحضر ودلوقتى انت فى غربتك متضايق لوحدك
مش لوحدى
لا لوحدك
الحمد لله على كل حال
أنا بكيت عليك بجد .. أنا ما أعرفهوش بس بكيت عشانك انت
وأنا أول دمعة تنزل من عينى دلوقت .. من ساعة ما عرفت ما بكتش ولا دمعة
..........
نزار مات
.........
الله يرحمه ويرحم موتانا أجمعين

هناك تعليق واحد:

همسة يقول...

البقاء لله
ولو انها متاخرة قوى
تحياتى