المــــــــــــــــــــــــــزاد

وخلاص بقيت فاضى..
افتح المزاد
اشترى كراسة الشروط
قبل الميعاد
اشترينى ببلاش
أصل أنا ما أسواش
مهندس فى بلد بايظة
عالة..على بلد مش عايزة
عددنا كتر يا مان
للأسف.. سو باد
كترنا عليهم...
ركبونا القطر...
وحرقونا فى الأعياد
خلفنا عيال..
ركبونا عبارة..
وغرقونا فى الحال
"آآآآآآآآه يا أوغاد"
إخرس يا حمار..
ده سافر من قاعة كبار الزوار
راح يعالج العصب السادس
ولا باينه كان السابع
آآه يا حقى اللى ضايع
بين لندن وباريس
يا ولاد المناجيس
دمنا السايل..
على ترابيزات القمار
كام واحد سافر..
قولى مين عاد
وسابوا ديول..
قصدى كلاب
بالطول والعرض ..
تنهش بلدنا
تقتل ولادنا
تسمم بدنا
خربوها العجول
ورجعوا قالولنا
اتبرع تنول
اتبرع لمرضى السرطان..
تنول رضى الرحمن
واتبرع للفقرا..
تسكن جنة خضرا
وإدى المسكين..
تنول الحور العين..
واكفل يتيم..
تصاحب الرسول الكريم..
يا اخواننا آمين..
بس فين فلوسنا..
ده من دخل قناة السويس
لوحده نهيص..
غير السياحة والبترول
ماتقولى فين فلوس دول
دى مصر خيرها يكفى دول
وإقرا التاريخ.. كام مرة فعل
قبل الخسيس ما ييجى
نهبها.. خربها
حلبها ... دبحها
واحنا ولادها..
عرايا.. حتى جوة البِدَل