ليلــــة من إياهم

ليلة تانية من الليالى إياها..
لأ لأ متفهمنيش غلط.. لا كانت ليلة حمرا ولا خضرا ولا حتى سودة..ليلة من الليالى اللى مالهاش لون.. ولا طعم ولا ريحة..ليلة سادة..من غير نوم ولا صحيان.. من غير متعة ولا حسرة...عارف إن عندى شغل بكرة.. واحتمال أسافر مرتين فى يوم واحد وفى الحالة دى يبقى معاك 24 ساعة تقريبا شغل متواصل..وطبعا لو الظروف تسمح يبقى أكيد هازور عشيقتى الجديدة.. القاهرة الساحرة.. مكنتش متخيل إنى أحبها بالشكل ده رغم إنى باكره الزحمة والدوشة بشكل يكاد يكون مرضى.. بس حبيتها.. من امتى الحب الايد.. المهم .. أدخل نام بقى وارحم نفسك.. مش نافع..
طيب تعمل إيه.. أنا فى الزعفرانة خلى بالك.. وكمان فى الصحرا.. قبل الزعفرانة ب 15 كيلو.... يعنى الهوا والصحرا والبحر ومنك للى خلقك سبحانه وتعالى..تدعيه يقصر ليلتك أو يرزقك النوم...
لو كنت فى بلد تانى كنت قعدت على قهوة أو دخلت سينما او اتمشيت فى الشوارع.. هنا التسلية الوحيدة انك ..... مش عارف بصرحة تعمل إيه... مستحل تخرج فى التلج ده الساعة 2 أو3 بالليل.. ومتنساش انها محطة تربينات رياح.. يعنى الجو أشبه بعاصفة فى سيبريا.. مع الفارق طبعا.. يعنى حدودك جوة شقتك.. وبشكل أدق.. جوة أوضتك..
التلفزيون قدامك..قلب القنوات السبعة.. دماغاك مش مستحملة حاجة جد.. ولا انت ناوى تهلس وتسمع أغانى فى الساعات الكريمة دى قبل الفجر خصوصا فى الأيام العشر الأوائل من ذى الحجة..الشهر الكريم وافضل عشر أيام فى السنة..ومش هتقرا حاجة بالتأكيد .. الدماغ اللى مش مستحملة برنامج جد فى التلفزيون مش هتقرا ولو مجلة ميكى.. وبعدين مين هيقنع إيديك انها تخرج من تحت البطانية عشان تمسك كتاب؟؟
قوم هات كيس لبن بخيره نص كيلو وقزازة كولا وقزازة مية.. طبعا من غير كبايات.. لا فيك دماغ تصب ولا تغسل الكبايات تانى يوم.. افتح كيس اللبن باسنانك واشربه على بق واحد ولا بقين.. وافتح قزازة الكولا اللتر ونص واشرب منها ما تيسر.. خلص قزازة المية.... وبعدييييين
قلب فى التلفزيون.. فيلمين أمريكانى ورا بعض .. تشوفهم من غير ادراك كامل.. بس تكتبهم فى قايمة أفلامك المفضلة..بالتأكيد لازم أضيف Alive, The Saint of Fort Washington للقايمة دى.. ومش وقت أسباب دلوقت..وبعدييين فى الليلة دى؟؟
امسك الموبايل.. تكلم مين؟؟ أصحابك الولاد كلهم عندهم شغل بكرة ومش هتصحى حد تتكلم فى كلام فاضى معاه.. ويدعى عليك بعدها للصبح ويمكن لغاية ما يرجع من الشغل وينام تانى.. ومش هتتكلم معاه فى احاسيسك ولا مشاعرك.. أنت غالبا مش باتحكى مع حد منهم فى كدة.. بترتاح مع البنات بس فى الموضوع ده...يبقى نكلم بنت... ياسلاااااااام وموبايلها يرن الساعة 3 بالليل وباباها ولا مامتها يكونوا صاحيين وتقوم حريقة عند المسكينة.. ولو مصحيوش والبنت ردت .. أول تفكيرها إن فيه مصيبة.. لا مافيش.. أنا متصل بأرغى أو بافضفض... ماشى هتتكلم معايا بربع دماغها.. والتلات ارباع الباقيين عمالين ينتفوا ورق الورد البرئ ( بيحبنى ومكسوف يقول... بيحبنى وهيقول آخر المكالمة... بيحبنى وهيقول السنة اللى جاية...مش بيحبنى بس بيفكر فيا) لا يا عم .. بلاها بنات دلوقت..أرن على الوحيدة اللى فتحتلها قلبى بجد لغاية دلوقت..حبيبتى السابقة.. كان نفسى تعدى صدمة الفراق أسرع من كدة عشان أستفاد بيها كصديقة فاهمانى ( منتهى الأنانية دلوقت.. بس أنا كمان هاكون صديق كويس ليها.. خصوصا إن الفراق مش بايدينا ولا برغبتنا يبقى ليه نخسر كل حاجة؟ الأمريكان والغرب بيطلقوا بشكل ودى وكتير بيقوا أصحاب بعدها) مش هينفع أكلمها تجنبا للانهيارات العاطفية من الناحيتين..أرن على موبايل أختها الكول تون "طمنى عليك.. وباروح على صورتك أحضنها وأنام" شكرا.. الرسالة وصلت وعارف ان حبيبتى هى اللى مختاراها وبترن عليا من موبايل أختها.. نرن على أختها التانية.. ازيك وازيك ووحشتنى.. فلانة عاملة ايه .. كويسة.. هى جنبك.. أيوة (كرسى فى الكلوب ومش هنعرف نتكلم أكتر من كدة عشان المواضيع متتفتحش أكتر من كدة واحنا بندعى انها تتقفل والبنت تتعود على الفراق) طيب.. سلام.. سلام
يبتدى شعورك بالذنب إنك عديت صدمة الفراق واتكيفت مع الوضع أسرع منها بكتير.. وتفكرتخطب تانى..وهى لسة بتتعذب.. غريب الحب ده.. 5 سنين باتعذب من حبها وهى بتتدلع عليا.. وسنة ونص حب جميل من الناحيتين.. وأول ما الفراق قرب لقيت طوفان حب جاى من ناحيتها.. طيب كان فين وانا باتقطع يا بنت الناس... ما علينا.
تكلم البنت اللى عايز تخطبها... يا سلاااااام؟؟ نفس الحريقة ممكن تقوم فى بيتها.. وبعدين الموضوع فى مشكلة لازم تتحل الأول..ولاهتدخل نفسك فى دوامة جديدة؟ وبنت الناس مالهاش ذنب تعلقها وترجع تقول متأسف.. حل مشاكلك وابقى تعالى عوم فى بحر الغرام الجديد..
وبعديييييييين فى الليلة اللى مش عايزة تعدى دى؟؟
لقيت الحل.. أمسك القلم وأكتب .. وبكرة نزله فى البلوج..يقراه كام واحد.. ويقولوا وفيها إيه؟ كلنا كدة.. ماكانش ليه لزمة ضياع الوقت ده..ويمشوا من غير ما يعلقوا على الادراج كالعادة... طظ..انت عارف انك تكتب لنفسك .. بتكتب عشان تفضفض ومتطقشمن جنابك... يمكن حتى الموضوع ده ما ينزلشوتكسل تكتبه كالعادة..
المهم بقى... أديك كتبت الموضوع فى الأجندة وخلصت...الموضوع خلص والليلة ما خلصتش....تعمل إيييييييييه؟؟